ଚମ୍ପୁଆ, ୧୭/୧୧ (ତ୍ରିନାଥ ମହାନ୍ତ) ଚମ୍ପୁଆ ଥାନା ଅନ୍ତର୍ଗତ ମହେଶ୍ବରପୁର ଛକ ନିକଟରେ ୨୦ ନମ୍ବର ଜାତୀୟ ରାଜପଥରେ ଭାରସାମ୍ୟ ହରାଇ ରାସ୍ତା କଡକୁ ଓହ୍ଲାଇ ଗଛରେ ପିଟିହେଲା କାର। ଫଳରେ କାରରେ ବସିଥିବା ସମସ୍ତ ୬ ଜଣ ଯୁବକ ଆହତ ହୋଇଛନ୍ତି। ଆହତଙ୍କ ମଧ୍ୟରେ ୪ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡିଛି। ଆହତ ମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଚମ୍ପୁଆ ଉପଖଣ୍ଡ ଡ଼ାକ୍ତରଖାନାରେ ଭର୍ତ୍ତି କରିଥିବା ବେଳେ ଗୁରୁତର ୪ଜଣଙ୍କୁ କେନ୍ଦୁଝର ଜିଲ୍ଲା ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ଆହତ ସମସ୍ତ ଯୁବକ ଚମ୍ପୁଆ ଏନଏସି ଅନ୍ତର୍ଗତ ଶିରପୁର ଗ୍ରାମର। ମିଳିଥିବା ସୂଚନା ଅନୁସାରେ ଶିରପୁର ଗ୍ରାମର ଦିପକ ଦାସ, ଚିତ୍ତ ରଂଜନ ମହାନ୍ତ, ବିକାଶ ମହାକୁଡ଼, ସୁଜିତ ସର୍ଦ୍ଦାର, ଯଶୋବନ୍ତ ମହାନ୍ତ ଓ ସୁଭମ ନାଏକ ଏସ ପ୍ରେସୋ କାର ନମ୍ବର ଓଡି ୦୨ ବିଟି ୮୭୫୧ ଯୋଗେ ଚମ୍ପୁଆରୁ ରିମୁଳି ଆଡ଼କୁ ଯାଉଥିବା ବେଳେ ମହେଶ୍ବରପୁର ନିକଟରେ ଭାରସାମ୍ୟ ହରାଇ ରାସ୍ତା କଡକୁ ତାଙ୍କ କାର ଓହ୍ଲାଇ ଏକ ଗଛରେ ପିଟି ହୋଇଯିବା ଫଳରେ କାରରେ ବସିଥିବା ସମସ୍ତେ ଆହତ ହୋଇଥିବା ବେଳେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଚମ୍ପୁଆ ଉପଖଣ୍ଡ ଡ଼ାକ୍ତରଖାନା ପଠାଇଥିଲେ। ଖବର ପାଇ ଚମ୍ପୁଆ ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି।