ଚମ୍ପୁଆ, ୩୦/୧୦ (ତ୍ରିନାଥ ମହାନ୍ତ) ଚମ୍ପୁଆ ଥାନା ଅନ୍ତର୍ଗତ ଚମ୍ପୁଆ ଏନଏସି ରାମଲା ଆମ୍ବବଗିଚା ନିକଟରେ ଏକ ସଡ଼କ ଦୁର୍ଘଟଣାରେ ଜଣେ ନାବାଳିକାଙ୍କ ମୃତ୍ୟୁ ଘଟିଥିବା ବେଳେ ଦୁଇ ଜଣ ଗୁରୁତର ଆହତ ହୋଇଛନ୍ତି। ଖବର ଅନୁସାରେ, ଆଜି ଅପରାହ୍ନରେ ଚମ୍ପୁଆ ନିକଟସ୍ଥ ଅଙ୍ଗାରପଦା ଗ୍ରାମର ମଧୁସୂଦନ ମହାନ୍ତ ଝିଅ ଖୁସିରାଣୀ ମହାନ୍ତ (୧୨) ଙ୍କୁ ବାଇକରେ ନେ଼ଇ ରିମୁଳି ନିକଟସ୍ଥ ରାମଚନ୍ଦ୍ରପୁର ଗ୍ରାମରେ ଥିବା ଭଉଣୀ ଘରକୁ ଯାଉଥିଲେ। ସେଠାରେ ଦିପାବଳୀ ପାଇଁ ଝିଅକୁ ଛାଡ଼ି ଘରକୁ ଫେରିଥାନ୍ତେ। ହେଲେ ଦଇବ ସହିଲା ନାହିଁ। ଏକ ବେପରୁଆ ବାଇକ୍ ଚାଳକଙ୍କ ଯୋଗୁଁ ଦୁର୍ଘଟଣାରେ ସପ୍ତମ ଶ୍ରେଣୀରେ ପଢ଼ୁଥିବା ନାବାଳିକା ଝିଅର ଜୀବନ ଦୀପ ଅକାଳରେ ଲିଭିଗଲା। ରାମଲା ଆମ୍ବ ବଗିଚା ନିକଟରେ ଆଗରେ ଯାଉଥିବା ଏକ ଟ୍ରଲରକୁ ଓଭରଟେକ୍ କରୁଥିବା ବେଳେ ବିପରୀତ ଦିଗରୁ ଦୃତ ଗତିରେ ଆସୁଥିବା ଏକ ବାଇକ୍ ଧକ୍କାରେ ମଧୁସୂଦନ ଓ ଖୁସିରାଣୀ ଟ୍ରଲର ରେ ବାଡେଇ ହୋଇ ଯାଇଥିଲେ। ଗୁରୁତର ଅବସ୍ଥା ରେ ଆହତ ମାନଙ୍କୁ ଉଦ୍ଧାର କରାଯାଇ ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରା ଯାଇଥିଲେ ହେଁ ସେଠାରେ ଡାକ୍ତର ଖୁସିରାଣୀଙ୍କୁ ମୃତ ଘୋଷଣା କରିଥିଲେ। ମଧୁସୂଦନଙ୍କ ଅବସ୍ଥା ଗୁରୁତର ରହିଛି। ସେହିପରି ବେପରୁଆ ଗାଡ଼ି ଚାଳନା କରି ମଧୁସୂଦନଙ୍କ ବାଇକକୁ ଧକ୍କା ଦେଇଥିବା ଡେଣୁଆ ବରଜୁସାହିର କୁଶଧ୍ଵଜ ହେସା (୧୯)କୁ ମଧ୍ୟ ଗୁରୁତର ଆହତ ଅବସ୍ଥାରେ ଚମ୍ପୁଆ ଡାକ୍ତରଖାନାରେ ଭର୍ତ୍ତି କରାଯାଇଛି। ଖବରପାଇ ଚମ୍ପୁଆ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ଜଣା ପଡିଛି।