ଚମ୍ପୁଆ, ୧୫/୦୫ (ତ୍ରିନାଥ ମହାନ୍ତ) କିଙ୍ଗ ମେକର ଥିଲି ଏବେ କିଙ୍ଗ ହେବି କହି ସର୍ବସମ୍ମୁଖରେ ଡିଣ୍ଡିମ ପିଟୁଥିବା ଚମ୍ପୁଆ ନିର୍ବାଚନ ମଣ୍ଡଳୀର ଚର୍ଚ୍ଚିତ ବାହୁବଳୀ ନେତା କୁହା ଯାଉଥିବା ବିଜେଡିର ବିଧାୟକ ପ୍ରାର୍ଥୀ ସନାତନ ମହାକୁଡ଼ଙ୍କୁ ଜୋତା ମାଳ ପିନ୍ଧାଇବାକୁ ଉଦ୍ୟମ କରାଯାଇଛି। ସନାତନ ମହାକୁଡ଼ ତାଙ୍କ ସମର୍ଥକ ମାନଙ୍କ ସହିତ ଚମ୍ପୁଆ ବ୍ଲକ ଅନ୍ତର୍ଗତ କୋଦଗାଡ଼ିଆ ପଞ୍ଚାୟତ ମିରିଗିଶିଙ୍ଗା ଗ୍ରାମରେ ପ୍ରଚାର କରୁଥିବା ବେଳେ ଜଣେ ବ୍ୟକ୍ତି ତାଙ୍କୁ ଜୋତା ମାଳ ପିନ୍ଧାଇ ବାକୁ ଉଦ୍ୟମ କରୁଥିବାର ଏକ ଭିଡିଓ ମୋବାଇଲରୁ ମୋବାଇଲକୁ ଘୁରି ବୁଲୁଥିବା ଦେଖିବାକୁ ମିଳିଛି। ତେବେ ବ୍ୟକ୍ତି ଜଣକ ସନାତନ ମହାକୁଡଙ୍କୁ ଜୋତା ମାଳ ପିନ୍ଧାଇବା କ୍ଷଣି ତାଙ୍କ ସମର୍ଥକ ମାନେ ଜୋତା ମାଳ ଓହ୍ଲାଇ ଦେବା ସହିତ ବ୍ୟକ୍ତି ଜଣକୁ ଦୂରକୁ ଟାଣି ନେଇ କାହିଁକି ଜୋତା ମାଳ ପିନ୍ଧାଇଲୁ ବୋଲି ପ୍ରଶ୍ନ କରିଥିଲେ। ବ୍ୟକ୍ତି ଜଣକ ସନାତନ କଥା ଦେଇ କାମ କରୁ ନାହାନ୍ତି ବୋଲି ଅଭିଯୋଗ କରିଥିବା ବେଳେ ସନାତନ ମହାକୁଡ ବ୍ୟକ୍ତି ଜଣଙ୍କୁ ତୁମ ଗାଁ ଆସିଛି ତେଣୁ ମୋତେ ଏପରି ଅସମ୍ମାନ କରିବା ଉଚିତ୍ ନୁହେଁ ବୋଲି କହୁଥିବା ଭିଡିଓ ରେ ଶୁଣିବାକୁ ମିଳୁଥିବା ବେଳେ ଆସନ୍ତା ଜୁନ ମାସରେ ତୁମ କାମ ସମ୍ପୁର୍ଣ୍ଣ ହୋଇଯିବ ବୋଲି ମଧ୍ୟ ପ୍ରତିଶ୍ରୁତି ଦେଉଥିବା ଭିଡିଓ ରେ ଶୁଣା ଯାଉଛି। ତେବେ ଯେଉଁ ସନାତନ ମହାକୁଡ଼ଙ୍କୁ ସାଧରଣ ଜନତା ଦେଖା କରିବାକୁ ଯାଇ ସକାଳୁ ସନ୍ଧ୍ୟା ପର୍ଯ୍ୟନ୍ତ ଗେଟ ବାହାରେ ଘଣ୍ଟା ଘଣ୍ଟା ଧରି ଖରା, ବର୍ଷାରେ ଛିଡା ହେଲା ପରେ ବି ଲୋକେ ଦର୍ଶନ ନ ପାଇ ନିରାଶ ହୋଇ ଫେରିବାକୁ ବାଧ୍ୟ ହୋଇଥାନ୍ତି ସେ ପୁଣି ଲୋକଙ୍କୁ ସମ୍ମାନ ଦେବା ଉପରେ ଟିପ୍ପଣୀ ଦେବା ଏବେ ଚମ୍ପୁଆ ଅଞ୍ଚଳରେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି।